Retour page d'accueil       Retour Ville du Conquet   

DEFENSE DE L'ILE DU CONQUET

EN 1625

Commission donnée par le duc de Vandosme, gouverneur de la Bretagne, au baron de Kerléach, pour la garde de l'Isle du Conquet (presqu'île de Kermorvan).

César duc de VANDOSME, de Mercœur, de Penthievre, de Beaufort, d'Estampes, pair de France, gouverneur et lieutenant général avec toutz droitz et pouvoirs d'admirauté en Bretagne ; à toutz ceulx qu'il appartiendra, salut.

Le sieur baron de Kerléach sestant, il y a environ deux mois jetté par l'advis de plusieurs gentilzhommes et gentz de qualitté de ceste province, dans l'isle du Concquest avecq cent hommes de guerre, auroit apporté un tel soign à la garde et conservation d'icelle, qu'il n'en est arrivé aucun accidant jusques à ce jour, qu'il estoit prest de demander à en estre deschargé. Mais d'aultant que nous avons jugé la dicte isle de trop grande importance au bien du service du Roy et repos de ses subiectz, pour la laisser ainsy abandonnée et exposée aux descentes que les ennemis de sa Maigesté pourroient avoir dessain d'y faire pour s'en emparer, et qu'elle ne peult estre confiée à personne qu'y aye plus de cappacitté, valleur, expériance au fait des armes, fidélité et affection au service du Roy, que le dit sieur baron de Kerleach.

A ces causes, suivant la vollonté de sa Maigesté, nous l'avons commis, ordonné et depputé ; commettons, ordon­nons et depputons par ces présantes, pour continuer à prandre le soign de la garde et conservation de la susdicte Isle du Concquest, dans laquelle, jusques à ce qu'il aye recu autre ordre de sa Maigesté ou de nous, il rettiendra les dictz cent hommes de guerre, qu'il séparera par corps de garde qu'il posera aux lieux et endroiltz plus accessibles, et, avecq iceulx, se tiendra en estat de repousser toutz ceulz qui au preiudice du service du Roy, vouldroient entreprandre sur la dicte isle, où il ne souffrira entrer personne plus fort que luy, et n'en sortira sans exprès commandement de sa Maigesté ou de nous, et générallement fera tout ce quy sera requis et nécessaire pour la conservation et seuretté d'icelle.

Donc nous lui avons donné et donnons plain pouvoir et mandement spécial. Sy, donnons en mandement aux séneschal et officiers royaux de Sainct-Renan de faire enre­gistrer ces presantes, et à eux et à toutz autres officiers subiectz de sa Maigesté de nostre gouvernement et autres qu'il appartiendra, de donner au dit sieur baron de Kerleach touttes l'assistance, ayde et confort que pour l'exécution de ce que dessus il aura besoign et leur demandera.

En thesmoign de quoy nous avons signé les présantes à Nantes, ce vingt-septiesme jour d'avril mil six centz vingt et cinq.

Signé : César DE VANDOSME.

Et en marge est escript : Commission audit baron de Kerléach pour garder le Concquest. Plus est escript par monseigneur Fabres.

Par copie : François KERGROADES.

La presante coppie collationnée à l'original et signée comme dessus et scellée, est demeurée au Greffe de la Court Royalle de Sainct-Renan et Brest suivant ordonnance de ce jour estant au bas de requeste presantée par le dit seigneur de Kergroadès.

Faict et ordonnancé de messieurs le Bailliff et Lieutenant, présants, monsieur le Procureur du Roy de la dicte Court, le vingt-quatriesme jour de May mil six centz vingt et cinq.

Ainsi signé : J. LE DEAUGUER, bailliff ; DE CHANNOUFF, lieutenant ; Hervé LE JAR, procureur du roy et CHARLES, greffier.

Signé : CHARLES, Greffier.

Commission donnée par le duc de Vendosme aux officiers de la juridiction royale de St-Renan, pour se rendre à l'île du Conquet (presqu'île de Kermorvan), afin de dresser procès-verbal des travaux faits par le baron de Kerlech.

Le duc de VENDOSME, pair de France, gouverneur et lieutenant général pour le Roy, avecq tous droictz et pouvoirs d'admiraulté en Bretaigne.

Il est ordonné aux officiers de la jurisdiction royalle de Sainct-Renan, ou à l'un d'eulx en l'absance ou empeschement des aultres, qu'ils ayent à se transporter en l'isle du Concquest, pour faire procès verbal des démolitions que, suivant la volonté du Roy, le sieur baron de Kerlech fera faire des fortifications tant anciennes que nouvelles quy sont en la dicte isle, ensemble des gents de Guerre y estant, et de ceulx que le dict sieur baron de Kerlech y a entretenus ; affin que par les moiens des dicts procès verbaulx, il apparise de l'exécution des commandemantz de sa Maiesté et que le dict baron de Kerlech puisse demander et poursuivre, vers qui il voira bon estre, les remboursementz des sommes qu'il peult avoir advancées pour la garde, conservation et fortification de la dicte isle.

Faict, à Nantes, ce quatorziesme jour de juillet mil six centz vingt et cincq.

Ainsy signé : César de VANDOSME, et plus bas par Monseigneur JABRE, et scellé du sceau des armes du dict seigneur. Ainsi signé : Francois de KERGROAZES.

Signé : CHARLES, Greffier.

ESTAT et roule des soldatz que Monsieur de Kergroadès, baron de Kerlech, tient dans l'isle du Concquest pour le service du Roy :

Et premier,

Monsieur de Keruzon, son lieutenant.

Monsieur de Barge.

Le sieur de Tromenec.

Le sieur de Trévanec.

L'escoade du sieur de Kerbaol :

Claude Le Long, sieur Duplessix, amspassade.

Claude Loiasiau.

Sébastien Oger, dict La Chasse.

Jan De Launay, dict La Coste.

Laurens Lenoir, dict Liscoat.

Francois La Haye.

Mathieu Jourdren, dict Soubise.

Claude Kerscaven.

Francois Le Jan.

Laurens Le Kerhuel.

Guillaume Inisan.

Gilles Santbois.

Yvon Le Taniou.

Nouel Le Queré, dict Lespine.

Guillaume Labbé.

Francois Lestanc.

L'escoade de Monsieur de Lanfeust :

Noble Jan Touronce, sieur de la Pallue.

Noble Jan Kerian, sieur de Kervanec.

Noble Laurens Hamon, sieur de la Sauvagères.

Hamon Sallaun, maistre armurier.

Jan L'Hospital.

Bernard Cam.

André Jourdren.

Jan Pondaven.

Guillaume Avril.

Jan Le Guen, canunier.

Tanguy Cornic.

Francois Jezequel, dict Maillot.

Yvon Petton.

Yvon Castel.

Noble Francois Millon, sieur de Kernec'h.

Guillaume Cocquet, dict la Ruine.

L'escoade de Yvon Le Guillart :

Yvon Le Borigne.

Jan Le Guichoux.

Jan Le Scaf, le vieux.

Jan Le Scaf, le jeune.

Paul Quéméneur.

Martin Ascouet.

Cristofle Lazou.

Phillippe Brenterch.

Jan Brenterch.

Noble Charles Keranguen, sieur de Keranouas.

Jan Henry, dict Malbaty.

Ramon Lavanant.

Hervé Dubois.

Hervé Prigent.

Guillaume Mahé, dict Lesier.

Jan Le Tallec.

L'escoade de noble Francois Kerdeniel, sieur de Poulguigran :

Noble Pierre de Kerdeniel, sieur de Tranguilly, amspassade.

Noble Claude Ploue.

Claude Dubois.

Francois Dubois.

Jan Leostic, dict le Tuteur.

Francois Le Goff, dict le Philosoffe.

Yvon Kerdeber.

Yvon Le Lan, dict le Mors Blanc.

Francois Pervez.

Hervé Le Borigne.

Guimarch Sallaun.

Yvon Plouerin.

Goulven Henry, dict la Fortune.

Mathias Tanguy.

Tanguy Guillemin, dict Vogue Solle.

0llivier Garnez.

L'escoade de noble Francois Keranrais, sieur de Penanprat :

Yvon Henry, dict Sans-Soucy, amspasade.

Paul Le Gentil.

Gilles Refily.

Vincent Le Millour.

Francois Cadalen.

Marc Bergot.

Laurens La Haye.

Prigent Le Brelles.

Yvon Coleau, dict le Petit-Soldat.

Yvon Roignant, dict l'Andouille.

Prigent Pelleau, dict Bondic.

0llivier Gahaignon.

Cristofle Provost.

Robert Cléach, dict des Elonges.

Mathieu Amandour, dict des Regretz.

Guion Nicollas, dict la Borlotte.

L'escoade de noble Guillaume Le Roux, sieur de Lésider :

Francois Bonnavanture, amspasade.

Yvon Roppart, dict Calletour.

Ambroise Perrot, dict la Ruine.

Bernard Tandeau, dict la Fleur.

Laurens Le Tynevez, dict Maisons.

Mathieu Le Fourdiles.

Pierre Quéméneur, dict Lalande.

Jan Brenterch, le vieux.

Paul Brenault.

Francois Logez.

Nicollas Querré.

Hervé Gestin.

André Nicollas Queré.

Hamon Perret.

Jan Le Gal.

Jan Cozian.

Faict le mercredy, sixiesme jour d'aoust, mil six centz vingt et cincq, pour estre preté (présenté) à messieurs les juges et officiers du Roy de Sainct Renan.

Les sieurs Claude RAISON et DE KERVENNOU, sergentz de bandes.

Jan LE GODEC et Jan LE BLANC, canoniers et le tambour. 

Ainsy signé, Francois DE KERGROADES ; Francois KERMORVAN, lieutenant.

Et a esté, le dict rolle, garanty et la monstre des soldatz y desnommés, faicte en présance de messieurs les officiers de la Court royalle de Sainct Renan et Brest, le sixiesme jour d'aoust mil six centz vingt et cincq, duquel rolle coppie est demeurée au greffe de la dict Court, soubz le sign du dict sieur de Kerlech.

Signé : J. LE DEAUGUER. - Hervé LE JAR, procureur du Roy. — CHARLES, greffier.

Etat dresse à la requête du duc de Vandosme, gouverneur de la Bretagne, des fortifications faites dans l'île du Conquet (presqu'île de Kermorvan) par le seigneur de Kergroadès, baron de Kerlech.

Jan LE DEAUGUER, escuyer, sieur Du BISLOU, conseiller du roi, bailly et juge Ordinaire en la Jurisdiction de Brest et Saint-Renan,

Scavoir faisons, que estant en la ville de Brest, le troisiesme jour d'aoust, an présant mil six cents vingt et cinq, où estoien aussy maistre Hervé Le Jar, escuier, sieur du Cleuzmeur, procureur du roi et le soubsignant, Charles, greffier de la dicte juridiction, messire Francois, seigneur de Kergroadès, baron de Kerlech, nous auroit presanté requeste tendante à ce que eussions à condescandre en l'Isle de Kermorvan, près le bourg du Concquest, pour procéder à  l'estat et procès verbal des fortifications qu'il y auroict faict faire pendant qu'il y a commandé pour le service du Roy et conservation du pais, d'aultant qu'il auroit eu commandement de sa dicte Maiesté, de licencier la garnison, et que le seigneur duc de Vandosme, gouverneur et lieutenant général pour le Roy en ceste province, lui auroict envoyé une commission à nous adressante pour procéder au dict estat. Sur laquelle requeste aurions ordonné qu'il y seroit condescandu pour estre procédé au dict estat au sixiesme jour de ce présant mois.

Lequel jour advenu, nous nous serions transporté de nostre maison du Bizlou au bourg du Concquest ; où estant randu, environ les huict heures du mattin, aurions trouvé lesdicts procureur du Roy et greffier, quy nous auroient dict avoir condescandu dès le jour d'hier à la dicte fin. Et environ les onze heures du dict jour, le dict seigneur de Kerlech se seroit présanté, assisté de maistre Francois Meastrivez, advocat, son conseil. Lequel, persistant aux fins de la dicte requeste, nous auroit apparu la dicte commission du dict seigneur duc, dabtée du quatorziesme juillet dernier ; Signée Caisar de Vandosme. Et plus bas, par mon dict seigneur Jabre ; et scellée, avec une lettre du Roy, adressante à monseigneur le baron de Kerlech, escrite à Fontainebleau, le vingt et deuxiesme de juin. Signée, Louys, et plus bas, Potier. Comme aussy le dict procureur du Roy, auroit repnté (représenté) une ordonnance du seigneur de Sourdéac, concernant les dictes fortifications, dabtée du dict jour troisiesme de ce mois. Signé René de Rieux, et plus bas, par commandement de monseigneur, Kerguelen ; avecq coppie de la lre (lettre) de sa dicte Maiesté, adressante au dict seigneur de Sourdeac, pour mesme subiect, du dict jour vingt et deuxiesme de juign. Pour copie, signé, Sourdeac.

Et nous a, en oultre, le dict seigneur de Kerlech, remonstré que la noblesse de cet évesché, assemblée en la ville de Lesneven, soubz l'auctorité du seigneur de Sourdéac, lieutenant pour Sa Maiesté en Basse Bretaigne au commencement de febvrier dernier pour délibérer des moiens expédians de conserver le dict évesché en l'obéissance de Sa Maiesté et empescher les dessantes de ses enemis rebelles, auroict advisé et jugé nécessaire, ensemblement avecq le dict seigneur, de mettre une compaignie de cent soldatz en l'isle du Concquest, pour empescher que les dictz rebelles ne s'en fussent emparés pour la fortifier à la ruine de tout le pais. Cognoissantz l'importance et la conséquance de la dicte isle, quy est naturellement forte de sa situation, et facille a retrancher ; en sorte que venant à estre surprise par les ennemis, quy avoient deisa (déjà) attenté et exécutté mesme une partie de leurs desseins en aultres portz et hauvres de la province, et causeroit totallement la ruine et perte du traffic de mer si les dictz enemis avoient une fois la disposition de la rade et hauvre du dict Concquest, passage plus hanté des mariniers tant du royaulme qu'estrangers au rapport des pillottes et de ceulx quy s'entendent au faict de la marine, auroient unanimement requis le dict seigneur remons­trant de prandre la garde et conservation de la dicte isle avecq les dicts cent soldatz, qu'ils promettoieut luy fournir et défrayer pour ung mois, attendant la vollonté et l'ordre que sa dicte Maiesté y voudroit donner pour la conservation de la dicte place ; et qui ayant accepté pour la conservation du pays, il y seroit entré le deuxiesme du dict mois de febvrier avec le dict nombre de cent soldatz, des quels la noblesse des environs n'en auroit payé que environ la moictié pour le dict mois seullement, ayant esté obligé de payer de ses propres deniers ses aultres soldatz, lieutenant, enseigne et aultres gentilz hommes qui eussent aucthoritté de commander en son absence ; sergent major, quattre corporaulx, deux tambours, un maistre cannonier et deux servants desquels le maistre tiroit douze escus et les deux, huict de gaiges par mois ; oultre quelques gentilz hommes, au nombre de vingt, ou plus, qui se seroient avec luy jetté en la dicte isle pour le service du Roy ; qu'il auroit touziours eu à sa table sans avoir paie, et auroit continué le dict entretien à ses frais, attendant de jour en jour scavoir la vollonté de sa Maiesté, vers laquelle il auroit dépesché un courrier à cest effet, laquelle ayant été sceu par lettre de sa dicte Maiesté luy avoit faict l'honneur de luy escrire du ……… par laquelle elle lui commandoit d'y demeurer jusque à la fin du mois d'avril avecq le mesme nombre de soldatz que la noblesse du pais avoit avisé ; qu'elle approuvoit comme utille pour son service, et que en la fin du dict mois d'avril, elle pourvoiroit au paiement et entretien de la dicte garnison, faisant l'estat et l'ordre des aultres garnisons de la province.

Ce que ayant exécutté, le dict remonstrant, suivant la volonté de sa dicte Maiesté et garny ses soldatz d'armes tant mousquetaires que piquiers et de pouldre, plomb, mèches et entretenu d'ordinaire deux armuriers pour tenir les dictes armes en ordre, sans aulchune paye ny assignation sur la rescription du domaine.

Finallement, par aultre despêche du dict remonstrant, sa dicte Maiesté, par aultre lettre du vingt deuxiesme juign dernier, luy a permis de se retirer de la dicte isle et commandé de démolir et ruiner les vieilles et nouvelles fortifications de la place, pour estre, le dict remonstrant, paié des frais qu'il a faicts et avancés pour la dicte garnison et pour faire les dictes fortifications, par les estats de la province, auroit obtenu la dicte commission de Monseigneur le duc de Vandosme, à nous adressante aux dictes fins, suivant laquelle il a requis estre procédé par nous à l'estat et procès verbal des dictes fortifications et logementz qu'il auroict esté obligé de faire pour la retraicte de ses soldats quy ont tousiours esté divisés par escoades et corps de garde sepparés, à cause de la grande estandue de la dicte Isle, de plus de demye lieue de circuit. Les dicts logements consistants en trois corps de garde ; un corps de logis, contenant salle, chambre, cuisine, forge, boutique de menuisier ; et les dictes fortifications, en un fort qu'il auroict faict à l'entrée, exposé (composé) de six bastions doubles retranchements autour et ung pont levis, et vériffication du nombre de ses dicts soldatz, tant par les rolles précédants que de la monstre qu'il désire estre faite ce jour devant nous, et comme il a actuellement entretenu le dict nombre, oultre les dicts gentilzhommes ayants commandement en son absance, canoniers, armurier et volontaires, et fourny de son propre bien à toutes les deppanses qu'il a convenu faire pour la conservation de la dicte Isle, tant pour les munitions de guerre qu'il a fourny aux dicts soldatz ; l'entretien des canons, quy consistent en deux de fonte verte, d'un milier chacun ; trois de fer coullé, un de douze cents et les deux aultres de huict chacun ; six fauconneaux, dix mousquetz à crocq de fonte verte, plus un demy fauconneaux ; quattre pierriers, chacun ayant deux bouettes.

Que pour l'achapt des dictes armes, pour les charrois assiductz en voiture de ses vivres, bleds, vins, bois et aultres choses nécessaires, quy luy ont cousté plus de cent cinquante livres par mois, les ayant faict rendre pour la plus grande part de son chasteau de Kergroadès, esloignée de plus de trois lieues de la dicte Isle, quy est entièrement dénuée de toutte sorte de commodittés.

Suppliant à estre receu à informer vers Monsieur le procureur du Roy par l'attestaon (l'attestation) de la noblesse du canton, les habittants du bourg du Concquest, ouvriers, artisans et architectes, tels que le dict sieur procureur du Roy vouldra nommer de son office, d'avoir, comme dict est actuellement, continué et entretenu la dicte garnison en la dicte forme.

Inclinant à laquelle requeste, et apprès que le dict procureur du Roy a nommé d'office et faict comparoir les expertz desnommés dans l'estat et estimation des dictes fortifications, les sermantz des dicts expertz prins au dict bourg du Concquest au devant de nostre logis.

En l'endroict s'est presanté noble home Tanguy Penfentenyo, sieur de Kermorvan, conseiller du Roy et son séneschal en la dicte court de Sainct Renan et Brest, lequel a remonstré qu'il est propriétaire de la dicte Isle de Kermorvan, dicte du Concquest, et adjacente à son mannoir de Kermorvan, et que de tout temps il et ses prédesesseurs ont jouy par leurs mains d'icelle ; et que, en l'an mil cincq centz nonante cincq, pour empescher les mauvais dessains et entreprinses du feu sieur de Fontenelle, qui tenoit garnison en l'isle Tristan ou Douarnenès, on feust contrainct de tenir des gentz de guerre en la dicte Isle soubs la conduitte du feu sieur de Kerourien, quy y fist bastir le corps de garde quy est à l'entrée d'icelle ; et quelques fortifications et tranchées pour sa conservation. Et tout deppuis, a chacun remuement de guerre, es années mil six centz quattorze, mil six centz saize et mil six centz vingt et deux, l'on y a faict entrer des gentz de guerre ; et pandant qu'il y a eu garnison en icelle, le dict suppliant n'en a jouy ny tiré aucun profict ; et encore, au mois de febvrier dernier, le dict seigneur de Kerlech y estant entré à la requeste de la noblesse de cest evesché de bas Léon, avecq cent hommes de guerre pour la garde et conservation d'icelle pour le dict mois, et y seroit demeuré du deppuis par commandement de Sa Maiesté. Lequel auroit faict faire des fortifications à la dicte entrée, oultre celles quy estoient faictes au dict an mil cincq centz quattre vingt quinze et d'auparavant, et faict faire des tranchées tout au tour de l'Isle et d'aultres retranchementz en divers endroictz et construire aultre corps de garde et des maisons recquises pour son logement et de ses soldatz, et pour ce faire, creuser la terre en divers endroictz pour tirer de la pierre et du mortier, et peler ou escorcher la terre pour avoir des mottes et gassons, affin de faire les dictes fortifications et tranchées ; et que par la fréquantation des soldatz faisantz leurs fonctions et exercices de guerre et d'aultres personnes et ouvriers quy ont travaillé aux susdictes fortifications, tranchées et bastimentz, l'herbe a esté tellement foullée et sy grand nombre de chemins faicts par icelle, que la dicte Isle est presque occuppée et randue du tout inutille et infructueuse au remonstrant, n'ayant tiré pour les six mois derniers que peu ou point de profit du revenu d'icelle, et ne peult espérer d'en tirer de six mois et jusques au printtemps, à cause des démolitions ordonnées par sa Maiesté, des dictes fortifications tant nouvelles que antiennes ; d'aultant plus que les ruines encombreront la meilleure partie de la dicte Isle et foulleront l'herbe et l'empescheront de se lever et croistre de longtemps.

Au moien desquelz encombrementz et occuppations par touttes les six années des susdicts mouvementz de guerre, le dict remonstrant a souffert de grands dommaiges, nottamment à l'occasion de ce que faict a esté durant la dicte garnison de six mois derniers et des susdictes démollitions quy seront faictes, sera le remonstrant frustré et endomaigé du revenu de plus d'une année du tiers de la dicte Isle.

De laquelle remonstrance il a recquis acte luy estre délivré, affin de demander et poursuivre récompanse des dommaiges par luy sousfertz par la non jouissance de la dicte Isle, ou et vers quy il croira l'avoir affaire, de quoy luy aurions décerné acte pour se pourvoir et luy servir comme appartiendra.

Ce que faict, serions de compaignie condescandus en la dicte Isle, traversans la rivière quy seppare le dict bourg de la dicte Isle. Près la porte et premiere entrée de laquelle, le dict sieur de Kerlech, accompaigné et suivy de nombre de gentilz hommes et soldatz, nous auroit faict marcher et rendre près une chapelle estant en ladicte Isle, où il auroit faict monstre et comparoir soubz les armes les personnes dénommées dans le rolle qu'il nous auroit à ceste fin présanté. Lequel rolle vériffié par avoir prins le sermant du dict sieur que des y dénommés, auroit esté le dict jour commancé à faire estat des dictes fortifications et bastimentz, à quoy auroit esté par nous continué le lendemain, septiesme dudict présent mois, ainsy qu'il est plus amplement rapporté par l'estat quy en a esté faict sepparé de c'est. Et aussy avons procédé, du consantement du dict procureur du Roy, à informa­tion sommaire de la continuation et assiduitté de la dicte garnison.

Et auroit comparu devant nous les nommés Ollivier Garnez, de la paroisse de Plouerin, et Jean Bozenner, de la paroisse de Guitalmezé, au ressort de ceste jurisdiction, lesquels nous ont dit que par cas fortuit, faisant fonction en ladicte place, ils seroient demeurés estropiés, scavoir : le dict Garnez, de trois doigtz ès la main gauche ; et le dict Bozenner, entièrement au bras droict. Suppliantz estre récompensés, ne pouvant gaigner leur vie et n'ayants aultres moiens pour se substanter. Lesquels Garnez et Bozenner avons, en présence du procureur du Roy, veus et recognus avoir, le dict Garnez, trois doibtz en la main gauche estropiés, et le dict Bozenner, entièrement estropié du bras droict pour ne le pouvoir aulcunement remuer.

Et pour parvenir à la dicte information sommaire, ont estés ouis les cy apprès nommés gentilz hommes, bourgois et habittants du Concquest :

Scavoir, noble home Guillaume Mol, sieur de Kerian ; escuyer, Allain Penmarch, sieur de la Villeneuffve ; Hervé Le Déauguer, escuyer, sieur de Kerandiou ; noble Hervé Pohan sieur de Launay ; et Bastien Pinart ; honnorables gentz, Jan Le Courleau, Yvon Brénéol, François Henou, Nouel et Jean Quéméneur, Auffroit Robert, Yvon le Saulx, 0llivier Magon et Paul Donnartz, desquels les sermants prins de dire veritté, ce qu'ils ont promis faire, ont tous unanimement et conformément dict et attesté que le dict sieur de Kerlech a tousiours eu le nombre de cent hommes pour le moins en sa garnison de la dicte Isle et ainsi continue deppuis son entrée en icelle jusqu'à ce jour sans aulcune intermise ni diminution du dict nombre. Ce qu'ils affirment comme devant véritable et ont signé.

Et nous a, le dict sieur de Kerlech, apparu un estat de frais et déppanses par luy faicts pour l'entretien de la dicte garnison, duquel estat est aussi coppie demeurée au greffe, soubz le signe du dict sieur de Kerlech.

Et de tout ce que dessus faict notre procès verbal et icelluy arresté au bourg du Concquest, en la maison de sire Yvon Brénéol, ce jour huictiesme du présant mois d'aoust mil six centz vingt cinq, soubz nos signes, ceulx des dictz sieur de Kerlech, du sieur de Kermorvan, du dict procureur du Roy, du dict Mastinier et des dictz gentilz hommes et habittantz du Concquest susnommés et de nostre adjoinct.

Ainsi signé : Francois de KERGROAZES, Francois de KERMORVAN, de PENFENTENYO, Guillaume MOL, F. MAESTRIVIEZ, A. PENMARCH, H. LE DEAUGUER, B. PINART, Hervé PORHAM, Jan COURLEAU, J. BRENEOL, Auffroit ROBERT, J. LE SAULX, N. QUEMENEUR, 0llivier MASSON, D. LE DEAUGUER, bailly, Hervé LE JAR, procureur du Roy et du soubs­signé greffier.

Signé : CHARLES, Greffier.

Procès-verbal des dégâts commis pendant la guerre de la ligue dans la presqu'île de Kermorvan, appartenant au sieur Tanguy de Penfentenyo, sieur de Kermorvan.

Jean le DEAUGUER, escuyer, sieur du BISLOU, conseiller du roy, bailly et juge ordinaire en la jurisdiction de Sainct Renan et Brest,

Scavoir faisons que noble home Tanguy Penfentenyo, sieur de Kermorvan, conseiller du Roy et son Séneschal et premier magistrat eu la dicte jurisdiction, nous auroict présanté sa requeste, par laquelle il nous représentoit que comme propprietaire de l'Isle de Kermorvan, dicte du Conquet, il auroit souffert de grands dommaiges durant les garnisons de gents de guerre qui auroient esté entretenues en icelle aulx mouvements de guerre en ceste province ès années mil cincq cents quattre vingts quinze, mil six cents quattorze, mil six cents saize et mil six cents vingt et deux ; et encore depuis le moys de febvrier l'an mil six cents vingt et cincq, que le seigneur de Kergroazès, baron de Kerlech, auroict à la requeste de la noblesse de cest Evesché de Léon et de l'aucthorité du seigneur de Sourdeac tenu garnison en la dicte Isle et entretenu des soldatz par commandement de sa Maiesté pour le temps de six moys ; et par les bastimentz qu'il y auroict fait faire et par les encombrements des attraicts, ruines et démolitions que le dict seigneur de Kerlech y auroict faict faire du depuis par commandement de sa dicte Maiesté, tant des antiennes que nouvelles fortifications. Nous suppliant de voulloir condescendre en la dicte Isle pour, en présance du procureur du Roy de la court, voir l'évidance des dicts encombrementz, tant par les dicts bastimentz et fortifications et par les démolitions d'icelles et le recepvoir à informer de l'estimation du revenu de la dicte Isle et des dommages par luy soufferts par la non jouissance d'icelle.

A quoy inclinant, aurions par l'expédition de la dicte requeste, du 4me jour de ce moys de juillet an presant mil  six centz vingt et six, donné assignation pour condescendre en la dicte Isle, et, en présance du procureur du Roy, voir l'évidance des dicts encombrementz quy nous seront monstres en la dicte Isle par le suppliant, et ensemble pour informer du temps que la dicte Isle auroict esté occuppée par l'entretenement des dictes garnisons et l'estimation des dicts dommaiges souffertz par le dict suppliant, au samedy en suyvant, onziesme du dict mois de juillet.

Et advenu le dict jour, onziesme de juillet mil six centz vingt et six, nous nous serions transporté exprès de la ville de Sainct Renan et de compaignie Hervé Le Jar, escuyer, sieur du Cleusmeur, procureur du Roy en la dicte court, de M. Jacques Morel, commis au greffe, prins pour adjoinct ; et serions rendus en la dicte Isle, distante de troys lieues, ou environ, du dict Sainct Renan, environ l'heure d'une apprès midy du dict jour.

Et à l'entrée de la dicte Isle, se serait présanté le sieur Penfentenyo, sieur de Kermorvan, lequel, en presance du dict procureur du Roy, auroict reppetté les faicts de la dicte requeste, et supplié de faire estat des ruynes et encombrementz faicts en la dicte Isle par les dicts bastimentz et démolition d'iceux, et prendre les sermantz des expertz cy apprès nommés d'office par le dict procureur du Roy, pour estimer le dégat et pour donner prix et estimation au revenu de la dicte Isle des dommages par luy souffertz par la non jouissance de la dicte Isle.

A quoy inclinant, du consentement du procureur du Roy, nous avons prins en sa presance le sermant de Francois Nédellec et Mathieu Peniniant et Yvon Mazon, de la parroisse de Plougonnvelin, ménaigers et faisant traffic d'achepter et de vendre du bestiail et de prendre à ferme les parcqs pour faire pasturer le dict bestiail. Desquels l'eng et chacun d'eux a esté le sermant prins, au cas recquis, de dire vérité et de donner vrai prix et estimation du dict revenu et des dommaiges souffertz par les dicts encombrementz et dégats de non jouissance de la dicte Isle, par le dict suppliant, ce qu'ils ont promis et juré faire.

Et ce faict, nous a, le dict suppliant, monstré la muraille quy est entre la porte et entrée de la dicte Isle, devers le havre du Conquet ; laquelle le dict Penfentenyo nous a monstre et dict qu'elle avoict esté ruynée lors des dictes démolitions et qu'il a faict reparer et refaire tout de neuff pour empescher le bestiail qu'il met dans la dicte Isle, de sortir hors d'icelle. Lequel pan de muraille mesuré par le dict Mazon, aussy prisaigeur, a esté trouvé contenir quinze toizes ou environ.

Et estants entrés de compaignie dans la dicte Isle, nous a, le dict suppliant, monstré à l'entrée d'icelle une estandue de terre où estait le vieux corps de garde et eng vieux chau (château) authour duquel le dict seigneur de Kergroazès avoict faict faire des bastions ; lesquels ayant esté desmolis, nous a esté monstré et avons veu que les attraicts et pierres sont demeurés sur le lieu, et encombrent enthièrement la dicte estandue de terre, laquelle contient, comme nous l'ont rapporté les dicts expertz, eng journal et demy de terre.

Et estants entrés plus avant en la diste Isle, et examiné par icelle et anthour, avons veu près la chappelle de Monsieur Sainct Sébastien, estant quasy au milieu de la dicte Isle, eng corps de logix ruiné et l'applacement encombré pareillement de pierres et aultres attraictz ; et dans une pointe, vers le septentrion et à l'orient d'eng petit port appelle Portz Pabu, eng corps de garde aussy ruiné, que le dict seigneur de Kergroazès avait faict bastir, et sont pareillement les pierres et attraictz demeurés sur le lieu et occuppent la bonne terre d'icelle.

Et faisant le thour de la dicte Isle, avons veu que les tranchées et aultres retranchementz que le dict seigneur de Kergroazès avait faict faire en divers endroictz de la dicte Isle et au thour d'icelle, sont tous jettés par terre et applanis et encombrent beaucoup de la bonne terre.

Nous a le dict suppliant, monstré et avons veu qu'il y a divers chemins par la dicte Isle pour la fréquentation des soldatz quy estoient en garnison et quy hantoient la dicte Isle et par les charroys que l'on a faict pour fournir les comodittés au dict seigneur de Kergroazès et aulx siens, au temps que le dict seigneur de Kergroazès a tenu la dicte au dict an mil six centz vingt et cincq. Lesquels chemins ont esté tellement battus et frayés que l'herbe n'y a peu depuis croistre. Et disent que l'applacement des dicts attraicts et logementz du dict seigneur de Kergroazès et corps de gardes et des dicts chemins contient environ troys journaulx de terre ou environ. Lequel applacement est demeuré aulx dicts endroictz comme inutile, estant encombré d'attraictz.

Et disent que la dicte Isle contient de circuit quattre mille pas et plus, et que la terre est fertille eu la dicte Isle et propre pour touttes sortes de bleds, poix, febvres et lin ; sans la trampée, faict de aussy bon rapport d'herbaiges et de meilleurs pasturaiges du canton.

Et d'aultant que la dicte Isle est d'une si grande estendue de terre, disent ne la pouvoir priser ny estimer au vray ; mais il leur semble qu'elle pourroit fournir d'herbe à la nourriture de quatre vingts vaiches par an ou environ ; et disent que communément en ce terroire du Conquet, la nourriture et herbaige d'une vaiche par chacun moys est estimée depuis le moys de febvrier jusques au mois de juilliet à raison de soixante solz ts. ; et pour le parsus de l'année, à raison de quarante solz ts. par moys.

Et disent avoir veu par deux foys de la gaignerie en la dicte Isle. Et trois années de suicte chacun cultivage sans auchun frambroys ne trampe, et qu'elle rapportoit le meilleur bled tant en bonté qu'en quantité de tout le cartier.

Et ce faict, nous sommes de compaignie rettiré de la dicte isle et traversé par le havre ou rivière qui sépare la dicte Isle d'avec le bourg du Conquet ; et estants rendus au dict bourg du Conquet, au logix de sire Yvon Brenéhéol, tenant hostellerye au dict bourg, après que le dict procureur du Roy a nommé d'office et faict comparoir les expertz cy apprès, scavoir : sires Yvon Brenéhéol, aigé de soixante et quatre ans, ou environ, et Auffroy Roppartz, aigé de quattre vingt troys ans ; et Laurans Floch, aigé de soixante six ans ; et Jean Le Corleau, aigé de septante neuff ans, tous marchantz et demeurant au dict bourg du Conquest, desquels ayant prins les sermantz de dire véritté, ce qu'ils ont promis faire et aussi sire Guillaume Brenheol, marchand du dict bourg, son sermant prins au cas requis. Et les dicts sieurs Fainignant, Macon, et Nédélec ont dict estre scavants et certains que le seigneur de Sourdeac, lieutenant pour sa Maiesté en ce païs bas, fit faire garde dans ladicte Isle, tant par les habitantz du dict bourg du Conquet que des habitantz des paroisses voisines en l'année mil cinq centz quatre vingts quinze, sous la conduite du feu sieur de Kerouvien, et ce, pour empescher le mauvais dessain du feu sieur de la Fontenelle, ce, incontinant qu'il se feust logé avec des gentz de guerre dans l'isle Tristan, ou Douarnenez, et ce pour la conservation du païs.

Aussy disent que lors des mouvementz de guerre ès années mil six centz quattorze, mil six centz saize et mil six centz vingt et deux en ceste province, le dict seigneur de Sourdéac fist faire garde continuelle en la dicte Isle ; et encore en l'année mil six centz vingt et cincq, le dict seigneur de Kergroazès y entra avecq cent soldatz et a tenu garnison continuelle deppuis le moys de febvrier jusques au moys d'aoust ; et depuis, par commandement de sa Maiesté, a faict démolir tant les nouvelles que antiennes fortifications et sont certains que le dict Penfentenyo a souffert beaucoup de dommaiges durant le temps que les dicts gentz de guerre ont esté en la dicte Isle, mais ne peuvent cotter combien de temps elles y ont demeuré obstant le laps du dernier temps ; mais disent que les dictes démolitions des battimentz quy avoient esté faictes, encombrent beaucoup de la meilleure terre de la dicte Isle, et ne peuvent dire à certain le dommaige que le dict Penfentenyo auroict reçu par chacun an, ny le revenu certain d'icelle, d'aultant que le sieur Penfentenyo et ses prédécesseurs ont tousiours tenu et maneuffré la dicte Isle par leurs mains tant par gaignerie et bleds que par pasturaige.

De tout quoy nous avons rédigé notre proces verbal par escript et icelluy délivré au sieur de Kermorvan, pour lui valloir et servir comme il appartiendra, soubz le sign du dict procureur du Roy, du dict sieur de Kermorvan, du dict Morel et des dicts Brenheol, Roppartz, Courleau et du dict Maçon. Et ont les dicts Floch, Sininiant et Nédellec déclaré ne savoir signer, les dicts jour et an.

Ainsy signé : T. PENFENTENYO, J. BRENHEOL, Auffroit ROPPARTZ, Jan LE COURLEAU, Yvon MAÇON, BRENHEOL, J. LE DEAUGUER, Hervé LE JAR, procureur du Roy et MOREL, commis au greffe.

Signé : CHARLES, Greffier.

Supplique adressée à Louis XIII par le sieur Tangui de Penfentenio, sieur de Kermorvan, pour obtenir le paiement d'une somme de 15,000 l., évaluation des dégâts commis dans la presqu'île de Kermorvan pendant la guerre de la Ligue.

AU ROY

Et à nos Seigneur de son Conseil.

SIRE,

Tanguy PENFENTENYO, escuyer, sieur de KERMORVAN, vostre séneschal en la jurisdiction de Sainct Renan et Brest en vostre païs de Bretagne, vous remonstre très humblement que l'Isle de Kermorvan, dicte communément pour le jourd'huy l'Isle du Conquet, contenant plus de une lieue de tour, abondante en pasturages, très fertille et propre à porter toutes sortes de grains et adjacente à son mannoir de Kermorvan, a de tout temps appartenu à ses prédécesseurs et encore aujourd'huy luy appartient en toute propriété. Ce néantmoings, depuis quelques années en ça, ayant pour sa situation esté remarquée de très grande conséquence et facille à fortiffier, feu Henry Le Grand, de glorieuse mémoire, en l'année gEc XXMJ xE. (1595) y auroit faict bastir quelques forts et estably des garnisons pour empescher les entreprises et mauvais dessains qu'avoit le feu sieur de Fontenelle contre cest estat, et depuis, Vostre Maiesté, suivant les traces de son dict feu seigneur et père, à touttes occurences et à chasque mouvementz de guerre notamment ès années gEic XIIIJ. — gEic XEI. — et gEic XXIJ. (1614, 1616 et 1622) y auroit faict entrer force gens de guerre pour defendre le dict païs contre les entreprises des rebelles et ennemis de son dict Estat. Lesquels dessains et entreprises voullant iceux rebelles continuer en l'année gEic XXE. (1625). Et vostre Maiesté en ayant eu advis des le commencement du mois de febvrier de la dicte année, elle auroit commandé au sieur Baron de Kerlech de sy jetter avec les trouppes de gentz de guerre qu'il jugeroit nécessaires pour la deffance d'icelle, où il auroit demeuré avecq toutes ses dictes trouppes pendant six mois entiers ; durant lequel temps il y auroit faict faire grand nombre de fortiffications nouvelles, outre celles qui y avoit déia auparavant esté faites pendant les dites années gEic XXIIIJ. XE. — gEic XIIIJ. — gEic XEI— et gEic XXIJ. (1595, 1614, 1616 et 1622), avecq des corps de garde, des sentinelles et des maisons pour sa retraicte et celle des dicts gens de guerre, oultre plusieurs tranchées tout à l'entour, pour empescher la descente de l'ennemy, et aultres retranchementz tant de pierre que de terre et gazon en divers endroitz et au travers de la dicte Isle.

Ce qu'il auroit continué jusques au mois d'aoust ensuyvant, que Vostre Maiesté, ayant pacifié touts les dicts troubles en son royaulme, luy auroit faict commandement de desmolir toutes les dictes fortifications. En quoy faisant, et au moien du grand nombre des dicts gentz de guerre et aultres travaillantz aux susdictes fortiffications, tranchées et retranchementz, il auroit grandement ruiné la dicte Isle, tant par le moien des grands creux et fosses qu'il auroit esté contraint de faire pour en tirer des pierres et mortiers pour construire les dictes fortifications et retranchements, que à cause que faisant les dictes démolitions et applanissant les dicts retranchementz, on auroit couvert la dicte Isle en divers endroitz et aux lieux les plus fertils d'icelle, des dits pierres, attraits, graviers et aultres maconneries. Joint que tant par le grand nombre d'ouvriers qui travaillaient, que par les fréquentes allées et venues des dicts gens de guerre et aultres personnes des païs circonvoisins y fréquentantz, l'herbe dont elle abondoit auparavant, a esté tellement foullée et les terres labourables tellement gastées et ruinées, qu'elles ne luy ont pendant le dict temps peu porter auchun fruict, et encore au commencement du mois de janvier an présant mil six cents vingt et sept, Vostre Maiesté ayant envoié trois compaignies de guerre du régiment du sieur Destissac, pour tenir garnison au bourg du Conquet, près la dicte Isle, le sieur chevalier Comicoes, commandant de l'une des dictes compaignies, auroit du commandement de Vostre Maiesté faict faire des retranchements et quelques fortifications et un corps de garde à l'entrée de la dicte Isle, et un retranchement tout autour de la chappelle de monsieur Sainct Sébastien, sittuée au mittan de la dicte Isle, et faict faire douve tout autour des dicts retranchementz, et au meilleur endroict d'icelle, et y faict entrer l'une des dictes compaignies en garde chacun jour. Ce quy porte préjudice au suppliant pendant toutes les dictes cincq années, de plus de quinze mille livres, sans comprendre le dégast qui se faict en la présante année mil six centz vingt et sept ; joint que d'un fort longtemps la dicte terre ne luy pourra ny produire le fruict et proffittementz en telle abondance qu'elle avoit accoustumé, le tout pour avoir esté la dicte Isle prinse et occuppée encore à presant pour le service de Vostre Maiesté.

A ces causes, Sire, et qu'il vous apparoit de ce que dessus par les procès-verbaux faicts de l'estat auquel le dict sieur baron de Kerlech a laissé la dicte Isle, lorsque par le commandement de Vostre Maiesté il a esté permis d'en sortir, les dicts procès verbaulx cy attachés, Plaise à Vostre Maiesté, ayant esgard aux dictes pertes et noniouyssances souffertes par le suppliant pendant que la dicte Isle, son ancien patrimoine, a esté occuppé pour le service de Vostre Maiesté, ordonner pour les dictes cincq années mil cincq centz quatre vingts quinze, mil six centz quatorze, mil six centz saize, mil six centz vingt et deux et mil six centz vingt et cincq, la somme de quinze mille livres lui estre délivrée par le thrésorier de vostre espargne, ou aultre qu'il plaira à Vostre Maiesté d'ordonner, et aussy pour le temps de la présante année, que la dicte Isle sera occuppée pour le service de Vostre Maiesté, le faire paier au proratta du temps à la raison que dessus, et ce faisant, le dict suppliant sera d'aultant plus obligé à prier dieu pour la santé et prospéritté de Vostre Maiesté.

Signé : PENFENTENYO.